Browsed by
Month: May 2012

இராப்பார்வை போற்றுதும்

இராப்பார்வை போற்றுதும்



என்னையா இது இராப்பார்வை இராப்பிச்சைனு கேவலமா தலைப்பு வச்சுகிட்டு. என்ன தான் நீ சொல்லவர…

அண்ணே, போன வாரம் புதுப்ளாக் புகுவிழா என்று என் தளத்தில்வெளியிடப்பட்ட பதிவைப் படித்தீர்களா? படிக்காவிட்டால் ஒரு சைட் அடிச்சிட்டு வந்துடுங்களேன். வசதியாய் இருக்கும்.
போன தலைப்பில் விஞ்ஞான மனோபாவத்தை (Scientific Mindset) கொஞ்சம் பார்த்தோம். விண்வெளி நோட்டமிடல் (Sky Watching)  பற்றிய அறிமுகத்தையும் கொஞ்சம் பார்த்தோம். தற்போது விண்நோட்டத்திற்கு மிக மிக இன்றியமையாததாகக் கூறப்படும் இராப்பார்வையை பார்க்கவுள்ளோம்.

இரவு+பார்வை=இராப்பார்வை. இரவுப்பார்வை (Night Vision). விண்நோட்டத்திற்கு அத்தியாவசியமான ஒன்று.  பார்வையில் என்ன பகல்பார்வை, இராப்பார்வை என வேறுபாடு?

வேறுபாடு இருக்கிறதே, என்ன செய்ய.

விண்வெளியை நோட்டமிட உகந்த நேரம் எது?

சின்ன பாப்பாவிடம், வானத்தில நட்சத்திரத்தை எப்ப பார்க்கலாம்?என்று கேட்டால் இராத்திரில தான்“ என டக்கென பதில் வரும். ஆக, நட்சத்திரங்களை இரவில் தேடுவதே பொருத்தம்
ஏன் பகலில் விண்மீன்களை தேடக்கூடாதா?

மண்டையைப் பிளக்கும் வெயில் நேரத்தில் விண்மீன்களை தேடினால் பைத்தியக்காரன் எனும் பட்டம் தான் கிடைக்கும். குதர்க்கமான இந்தக் கேள்வியை சற்று மாற்றிக்கேளுங்களேன். ஏன் பகலில் விண்மீன்கள் தெரியக்கூடாதா?என்று. லாஜிக்காக மாறிவிடும்.

கண்ணின் பாகங்கள் 
முதலில் பகல் வானத்தில் விண்மீன்கள் இருக்குமா? கண்டிப்பாக இருக்கும். பகலில் சூரியனின் வெளிச்சம் அதிகமாக இருப்பதால். அந்த வெளிச்சத்தின் முன் இவ்விண்மீன்களின் வெளிச்சம் டம்மியாகி விடும். இதனால், தான் பகலில் விண்மீன்கள் கண்களுக்குத் தெரிவதில்லை. சிறுவயதில் படித்திருப்பீர்களே. இன்னும் புரியவில்லையா?

ஒரு டார்ச்சை எடுத்துக்கொள்ளுங்கள். அதனை உங்கள் அறையில் எரியும் ட்யூப்லைட்டை நோக்கி அடியுங்கள். பிறகு, ட்யூப் லைட்டை அணைத்துவிடுங்கள். அறை இருண்டுவிடும். இப்பொழுது மீண்டும் அணைந்த ட்யூப்லைட்டை நோக்கி டார்ச்சடியுங்கள். இரண்டுக்குமிடையே வித்தியாசம் தெரிகிறதா? தெரியும். பேரொளியின் முன் சிற்றொளி சரணடைந்துவிடும். இப்பொழுது ஏன் பகலில் விண்மீன்கள் தெரிவதில்லை என்று புரிகிறதல்லவா.

நன்கு உள்வாங்கிக்கொள்ளுங்கள். விண்மீன்களை நோட்டமிட மட்டும் தான் இரவு அவசியம். விண்வெளியை அல்ல. பகலிலும் விண்வெளியை நோட்டமிடலாம். நட்சத்திரங்கள் தான் தெரியாதே ஒழிய சூரியன் தெரியுமல்லவா? சூரியனும் விண்வெளியில் தானே இருக்கிறது.

ஆக, விண்வெளியை எப்பொழுது வேண்டுமானாலும் நோட்டம் விடலாம். ஆனால், விண்மீன்களையும், கோள்களையும் இரவிலேயே நம்மால் நோட்டமிட முடியும். இருந்தாலும், பொதுவாக விண்வெளி நோட்டப் பொழுது என்பது இரவையே குறிக்கும்.

விண்நோட்டத்திற்கான நேரம் இரவு என்று முடிவுகட்டியாயிற்று. அடுத்து. இரவு நேரத்திற்கும் பகல் நேரதிற்குமான பார்வை வேறுபாட்டை சற்று பார்ப்போம். அதற்கு முன் கண்கள் எப்படி வேலை செய்கின்றன என்று தெரிந்துகொள்வோம் வாருங்கள்.

ரெட்டினாவில் பார்வை குவிக்கப்படுகிறது
நமக்குத் தெரிந்து கண்களின் பாகங்கள் என்னென்ன? வெள்ளை விழி, கருவிழி அவ்வளவுதான். வெளியிலிருந்து பார்ப்பதால் நமக்கு அவ்வளவு தான் தெரியும்.

சரி விடுங்கள் இப்போது கண்ணை வெளியில் எடுத்து குறுக்குவெட்டாக (Transverse Section) வெட்டிக்கொள்வோம். கற்பனை செய்ய கடினமாக இருக்கிறதா, கீழுள்ள படத்தை காணவும்.

தீர்ந்தோம், கண்ணில் இத்தனை பாகமா?

பதராதீர்கள். இவை அனைத்தையும் இங்கு நான் அலசி பிளேடு போட விரும்பவில்லை. படத்தில் ஒளி குவிக்கப்படும் ரெட்டினா(Retina)  என்ற பகுதி தெரிகிறதா? அதை மட்டும் எடுத்துக்கொள்ளுங்கள்.

நம் கண்களில் உள்ள குவிலென்ஸ் (Convex Lens), வெளியிலிருந்து வரும் ஒளியை ரெட்டினா எனும் பகுதியில் குவிக்கின்றது. இதனை மேற்கண்ட படத்தில் காணலாம். அவ்வாறு குவிக்கப்படும் ஒளியானது இந்த ரெட்டினாவில் பட்டு, பார்வையாக்கப்படுகிறது. எப்படி?

தடி மற்றும் கூம்பு செல்கள்
ரெட்டினாவில் பார்வை நரம்புகள் (Optic Nerves) அதிகம். செல்களை கொண்டு அந்நரம்புகளை இருவகையாய் பிரிக்கலாம், தடி செல் (Rod Cells), கூம்பு செல் (Cone Cells) என (படத்தை பார்க்கவும்). மேற்கொண்டு செல்லும் முன், ஒளியின் தன்மையையும் சற்று பார்ப்போம்.
ஒளி. ஒரு முப்பட்டைக் கண்ணாடி (Prism) வழியே செலுத்தப்பட்டால் இந்த ஒளி ஏழு நிறமாக (ஊதா, கருநீலம், நீலம், பச்சை, மஞ்சள், ஆரஞ்சு, சிவப்பு) பிரியும் என சிறு வயதில் படித்தது ஞாபகம் இருக்கும் என நம்புகிறேன். இதிலிருந்து என்ன தெரிய வருகிறது?
ஒளி எழு நிறங்களைக் கொண்டது. சரியா?

தவறு. முற்றிலும் தவறு என்றால் ஏற்றுக்கொள்வீர்களா? எற்றுக்கொண்டுதான் ஆக வேண்டும்.
ஒளி ஏழு நிறங்களைக் கொண்ட்தல்ல. நாம் காணும் ஒளி ஏழு நிறங்களைக் கொண்டது.
பொதுவான ஒளியிலிருந்து (Light) நாம் காணும் ஒளி (Visible Light) எப்படி வேறுபடுகிறது?

நாம் காணும் ஏழு நிறங்களுடன், ரேடியோ கதிர்கள் (Radio Waves), நுண் கதிர்கள் (Micro Waves), புறஊதா கதிர்கள் (Ultra-violet), அகச்சிவப்பு கதிர்கள் (Infra-Red), எக்ஸ்ரே கதிர்கள் (X-Ray), காமா கதிர்கள் (Gamma Ray) போன்றவற்றை உள்ளடக்கியதே ஒளி. இவற்றை மின்காந்த அலைகள் (Electro-magnetic Wave Spectrum) என்றும் அழைக்கலாம்.

ஏன் இவற்றை எல்லாம் நம்மால் காண இயலவில்லை?

அருமையான கேள்வி. ஏன் நம்மால் ஒளியின் மொத்த அலை வரிசையையும் காண இயலவில்லை. காரணம் நாம் ஏற்கனவே பார்த்த கூம்பு செல்களும், தடி செல்களும் தான். என்ன தொடர்பு பிறந்து விட்டதா? ஒளியின் ஊதாவிலிருந்து சிவப்புவரையுள்ள ஏழு நிறங்களைக் காண நமக்கு கூம்பு செல்கள் பேருதவி செய்கின்றன. இதனால் தான் ஹெச்.டி (HD) துள்ளியத்துடன் நம் உலகத்தை காண முடிகிறது. அப்படியென்றால் தடியின் வேலை?
ஏழு நிறங்களுக்கு அப்பால் (குறிப்பாக அகச் சிவப்பு) உள்ள நிறங்களை அரைகுரையாய் காண 

உதவுவது தான் இந்த தடிசெல்லின் வேலை. அப்படியென்ன வேலை?

ரொடாப்ஸின்
இந்த தடிசெல்லில் ரொடாப்ஸின்(Rodopsin) எனும் வேதிப்பொருள் உள்ளது. அதுதான் இரவில் அகச்சிவப்பு போன்ற கதிர்களைக் கொண்டு நமக்குப் பார்வை வழங்குகிறது. இராப்பார்வையை இந்த தடிசெல்லின் ‘ரொடாப்ஸின் கவனித்துக்கொள்கிறது. இரவில் (சரியாகச் சொல்ல வேண்டுமென்றால் வெளிச்சம் குறைந்த சூழலில்) நமக்கு பார்வையளிப்பவை தான் இந்த தடிசெல்கள். ஆக, இராப்பார்வையை பாதுகாக்க தடிசெல்லை பாதுகாக்க வேண்டும். இரவில் நிம்மதியாய் நடமாட தடிக்காரான் எவ்வளவு முக்கியமோ, இரவில் நிம்மதியாய் பார்க்க தடிசெல்கள் அவ்வளவு முக்கியம்.

அப்பறமென்ன. தடிசெல் அதுபாட்டுக்க அதன் வேலையைப் பார்க்கட்டுமே நாம் நம் வேலையப் பார்போம்.

எல்லாம் சுபம் என்று முடித்துக்கொண்டு போகலாம் என நினைக்கும் இந்த வேளையில் தான் புதிதாய் ஒரு பிரச்சனை முளைக்கின்றது.

தடிசெல்லில் ரொடாப்ஸின் என்ற வேதிப்பொருள் உள்ளதல்லவா? அது தான் உண்மையில் நமக்கு இராப்பார்வை கொடுக்கிறது என்று பார்த்தோமல்லவா? அது ஒரு நிலையற்ற வேதிப்பொருள். அதாவது, ஐஸ்கட்டி போல.

எப்படி வெப்பம் பட்டால் ஐஸ்கட்டி சிதைந்துவிடுமோ, அதே போல் இந்த ரொடாப்ஸினும் வெளிச்சம் பட்டால் சிதைந்துவிடும். வெளிச்சத்தை அகற்றிவிட்டாலும் இந்த ரொடாப்ஸின் மறுபடியும் ஒன்றுகூடுவதற்கு இருபது முதல் முப்பது நிமிடங்கள் பிடிக்கும், எப்படி நீராய் மாறிய ஐஸ் ஒன்றுகூட வெப்பம் நீக்கப்பட்டும் சில மணிநேரங்கள் பிடிக்குமோ அதைப்போல. இது தான் பிரச்சனை.

நான் வளவளவென சொல்லிக் கொண்டிருப்பதைக் காட்டிலும், ஒரே ஒரு பரிசோதனை உங்களுக்கு இதை தெளிவாக புரியவைத்துவிடும்.

கொஞ்ச நேரத்திற்கு முன் ஒரு டார்ச்லைட்டை எடுத்தோமே அதே டார்ச் லைட்டை எடுத்துக்கொள்ளுங்கள், அப்படியே ஒரு சிவப்புக் கண்ணாடியையும். இரவு வரும் வரை பொறுமையாய் இருங்கள். வந்ததா, நியூஸ் பேப்பர் ஒன்றையும் கையோடு எடுத்துக்கொண்டு இருட்டான பகுதி ஒன்றுக்குச் செல்லுங்கள் (போவதற்கு முன் காஞ்சனா, கீஞ்சனா போன்ற படங்களைப் பார்க்கவேண்டாம்). ஆச்சா, வானத்தை பத்து நிமிடம் வார்ன் போல் வெறிக்காமலும், கங்குலி போல் அதிகமாக சிமிட்டாமலும் பார்க்கவும். பத்து நிமிடம் கழிந்ததா? அப்படியே அந்த இருட்டில் குனிந்து செய்தித்தாளை பார்க்கவும். அரைகுறையாய் ஏதோ தெரியும்.
அடுத்து, டார்ச் லைட்டை ஆன் செய்யவும். அந்த வெளிச்சத்தில் ஒரு நிமிடம் செய்திதாளைப் படிக்கவும். வெளிச்சத்தை அணைக்காமல் வானத்தை பார்க்கவும். தங்கள் பார்வை எப்படி 
இருக்கிறது, என்ன மாறுதல் அடைந்துள்ளது என குறித்துக்கொள்ளவும்.

மீண்டும் முதலிலிருந்து இந்தப் பரிசோதனையை தொடரவும், சிவப்புக் கண்ணாடி அணிந்து. மாறுதல்களை குறித்துக்கொள்ளவும்.

செய்தாயிற்றா? என்ன முடிவுக்கு வந்துள்ளீர்கள். முதல் தடவையை விட இரண்டாம் தடவை செய்த பரிசோதனையில் தெளிவான இராப்பார்வை கிடைப்பதை உணர முடிகிறதா?
எல்லாம் ரொடாப்ஸினின் திருவிளையாடல் தான்.

முதல் தடவை நீங்கள் இருபது நிமிடம் இருளில் இருந்ததால், ரொடாப்ஸின் ஒன்றுகூடி உங்களுக்கு தெளிவான இராப்பார்வையை தந்தது. மீண்டும் வெளிச்சம் பட்ட்தால் சிதைந்தது.
இரண்டாம் தடவை நீங்கள் சிவப்புக் கண்ணாடி அணிந்திருந்ததால், ரொடப்ஸின் எள்ளளவும் சிதையவில்லை. கிட்டத்தட்ட ஒரே கல்லில் இரண்டு மாங்காய். இருளில் படிக்கவும் முடியும். இரவுப் பார்வையும் கெடாது.

இருளில் ஏனையா நாங்கள் படிக்க வேண்டும்?

விண்நோட்டமிட, விண்மீன்களின் இருப்பறிய நமக்கு விண்வரைபடம் (Sky Map) அவசியம். அந்த வரைபடத்தை வாசிக்க வெளிச்சம் தேவை. விண்வெளியை தெளிவாக காண இராப்பார்வை தேவை. வெளிச்சம் வந்தால் இராப்பார்வை இராது. இந்த முரண்பாட்டைக் களையவே சிவப்பு வெளிச்சம்.

சிவப்புக்கு எப்படி இந்த ஆற்றல்?

சிவப்பு நிறம் இயல்பாகவே நீளமான அலையாகும். எங்கிருந்து பார்த்தாலும் தெளிவாகத் தெரியக்கூடிய கவனத்தை ஈர்க்க்க்கூடிய நிறமும் கூட. இதனால் தான் சிவப்பு நிறம் ஆபாயத்தை குறிக்கப் பயன்படுகிறது. இதனால் தான் கவனத்தை ஈர்க்கும் ‘அந்தப்பகுதிக்கு சிவப்பு விளக்குப் பகுதி என பெயர் வந்திருக்குமோ என்னமோ (யோசிங்க).

வெளிச்சத்தை விடுங்கள், அது இயற்கை காரணி. இராப்பார்வையை கெடுக்கும் வேறு காரணி அதாவது, மனிதால் உண்டான கெடுதி ஏதும் உள்ளதா?

நிறைய உள்ளது. முக்கியமாக ஒளி மாசுபாடு (Light Pollution).

நீர் மாசுபாடு, காற்று மாசுபாடு என்றால் சரி. அதென்ன ஒளிமாசுபாடு?

ஒளியால் மாசுபடா வானமும்மாசுபட்ட வானமும். 
இயற்கையில் பகல் உலகுக்கு மட்டுமே ஒளி. இரவுக்கு இருள். இதுதான் நியதி. ஆனால் இன்றோ மனிதன் மின்விளக்குகளால் இரவை பகலாக்கியுள்ளான். இதனால், பல கெடுதிகள் உண்டு.
இருபத்திநான்கு மணிநேரமும் இன்றைய மனிதன் இயங்குவதால் அவனுடைய இராப்பார்வை குறைகிறது. குறிப்பாக நகரத்தினரிடம் தான் இராப்பார்வைக் குறைபாடு அதிகமாக உள்ளது. குன்றிய இராப்பார்வை மீண்டும் மீண்டும் குறையக்குறைய தடிசெல்கள் அழிகின்றன. இது மனிதனுக்கு ஏற்படும் தீங்கு. இதேபோல் விலங்குகள், பறவைகள், மரஞ், செடி, கொடிகளிடத்திலும் பல்வேறு கெடுதல்கள் முளைக்கின்றன. அவைபற்றி பார்ப்பது நம் கட்டுரையின் நோக்கமல்ல.

உங்களிடம் நான் தெளிவாகச் சொல்ல விரும்புவது ஒன்றுதான். இராப்பார்வையை போற்றிக்கொள்ளுங்கள். விண்வெளிநோட்டத்திற்கு மிக அத்தியாவசியமான ஒன்று. தயாராகுங்கள், அடுத்த பகுதியில் விண்நோட்டத்திற்கான மற்ற அடிப்படைகளை ஆராய.

  
   – ஏ.பி.தீன்
புது ப்ளாக் புகுவிழா – விஞ்ஞான மனப்போக்கு

புது ப்ளாக் புகுவிழா – விஞ்ஞான மனப்போக்கு




இந்தியர்களிடம் ஆராய்ச்சி மனப்பான்மை குறைவாக உள்ளதே. ஏன்?
இது பொதுவாகவே இந்தியாவிற்கு வரும் வெளிநாட்டவர்களின் கேள்வி. இது முற்றிலும் நியானமான கேள்வி என்பதை உணர்கிறீர்களா?

உணரவில்லையா, கவலைகொள்ளவேண்டாம். இந்தக் கட்டுரையின் நோக்கமே அதை உணர்வது தான்.
117 கோடி மக்களை கொண்டது இந்தியா. மனிதவளம் மிக்க நாடுகளின் வரிசையில் இந்தியாவிற்கு இரண்டாம் இடம் வேறு. இப்படிப்பட்ட மக்கள் பேராற்றல் மிகுந்த நாட்டில் ஆராய்ச்சி மனப்பான்மை என்பது மக்களிடையே மிக மிகக் குறைவாகவே காணப்படுகிறது. ஏன்?
இதற்கு, முதலில் இந்தியர்களின் மனப்போக்கு எவ்வாறு உள்ளது என புரிந்து கொள்வோம். பொதுவாக ஒரு நாட்டின் மனப்போக்கு என்பது அதன் நடுத்தரவர்கத்து மக்களை வைத்துத் தான் கணக்கிடப்படுகிறது. நடுத்தர வர்கத்து இந்தியர்கள் இங்கு ஒரே போல் இருக்கிறார்கள். கேரண்ட்டி (உத்தரவாதம்) எதிர்பாக்கிறார்கள். எதற்கெடுத்தாலும். வாங்கும் பொருளிலிருந்து, படிக்கும் கல்வியிலிருந்து, பார்க்கும் வேலையிலிருந்து, வாழும் வாழ்க்கை வரை. இதனை ஒருவகையில் தாங்கள் செய்யும் செயல் அனைத்திற்கும் ஆதாயம் தேடுகிறார்கள் என்றும் கொள்ளலாம். இது தவறா?
நிச்சயமாக இல்லை. ஆதாயம் தேடி வேலை செய்வது தான் மனித மரபு. ஆனால் உடனடி ஆதாயத்தை மட்டும் கணக்கில் கொள்வது அல்ல. உடனடி ஆதாயத்தை மட்டும் கணக்கில் கொள்வதென்பது மிகத் தவறான அனுகுமுறை. ஆராய்ச்சி மனப்பான்மைக்கு ஆப்பு வைக்கும் மிக மிகத் தவறான அனுகுமுறை. எப்படி?
அதற்கு முன். உடனடி ஆதாயம். மக்கள் இதனை எவ்வாறு கணக்கிடுகிறார்கள்.
யாமினி அபார்ட்மெண்ட்ஸ், முதல் தளம். 417ஆம் நம்பர் வீட்டின் படுக்கையறை. இரவு பத்தரை மணி. படுக்கையில் ராஜா, அவரது மகன், அவரது மனைவி.
என் கூட வேலை செய்யும் முருகனோட பையன் நேற்று மைக்ரோஸாப்ட் கம்பனியில ப்ளேஸ் ஆயிட்டான்”, என்று ராஜா சீரியல் பார்த்துக் கொண்டிருக்கும் தன் மனைவியிடம் கூறுகிறார்.
“அப்படியா”, வாய்பிளக்கக் கூறிவிட்டு மறுபடியும் நாடகத்தில் அயர்கிறாள்.
இது ஒரு நிகழ்வு. சொற்களால் பரிமாறப்படும் நிகழ்வு. இதன் பின்னே மனவோட்டத்தால் ஆன நிகழ்வும் இருக்கிறதல்லவா?
அவர்களது எண்ணவோட்டங்களை சுண்டக் காய்சினால் “நாமும் முருகனின் மகனைப் போல் நம் மகனையும் ஆக்கவேண்டும்என்பது தீர்மானமாய் வெளிப்படும். காட்டில் எலிகளுடன் விளையாடும் தன் மகனின் கனவுக் கைகளில் கணினி எலியை திணிக்க எடுக்கப்படும் தீர்மானம். இது ஒரு நிகழ்வு மட்டுமே. இன்னும் இதைப்போல் எத்தனையோ நிகழ்வுகள்.
பிறரை பார்த்து அவர்கள் எடுத்த முடிவால் அவர்கள் அடைந்த நிலையைப்பார்த்து ஏற்படுவது தான் உடனடி ஆதாயம் தேடும் மனப்போக்கு. சுருக்கமாக சொல்வதானால், மந்தையோடு மந்தையாய் திரியும் மனப்போக்கு. பலர் இவ்வாறு செய்தனரா? அவர்களுக்கு நல்லது கிடைத்ததா? அப்படியென்றால் நாமும் அவர்கள் வழியைப் பின்பற்றுவோம். நமக்கும் நல்லதுதான் கிடைக்கும். தனித்துவம் அவசியமில்லை”. இது தான் உடனடி ஆதாயத்தைத் தேடி மந்தையோடு மந்தையாய் திரிய வழிவகுக்கும் எண்ணப்போக்கு. இந்த மனப்போக்கு முற்றினால் பிறர் செய்வதை வினவாமால் தாங்களும் செய்ய மக்கள் துணிந்துவிடுவர், மக்கள் அனைவரும் ஒரே பாதையில் பயணப்படத் தயாராகிவிடுவர். தொலைக்காட்சி விளம்பரங்களின் தாரக மந்திரமே இதுதானே. இந்தப் போக்கு ஆராய்ச்சி மனப்பான்மைக்கு எப்படி ஆப்படிக்கிறது?
மக்கள் அனைவரும் ஒரே பாதையில் பயணப்பட்டால் எப்படி ஆராய்ச்சிகள் வளரும். அந்த ஒரே பாதையும் குறுகிய காலத்தில் பணம், புகழ், செல்வாக்கு ஆகியவற்றை அடைவதை நோக்கி சென்றால் எப்படி ஆராய்ச்சிகள் வளரும்? இக்குறுகியமனப்பான்மை என்பது ஆராய்ச்சிக்கு முழுமுதற் எதிரியல்லவா. ஆராய்ச்சியை வளர்க்க முதலில் விஞ்ஞானிகள் அவசியம். விஞ்ஞானியாக இருக்க விரிந்த மனம் அவசியம். பணம், புகழ், செல்வாக்கு ஆகியவற்றை தேடி எந்தவொரு விஞ்ஞானியின் மனமும் செல்லாது. அவனது மன வேட்கையின் ஈர்ப்புவிசையால் பேரும் புகழும் அவனை வந்தடையும். உத்தரவாதம் என்பதும் விஞ்ஞானியின் வாழ்க்கையில் இல்லவே இல்லை. இப்பொழுது சொல்லுங்கள் இன்றைய இந்தியர்களிடத்தில் விஞ்ஞானிக்கான மனப்போக்கு உள்ளதா?
இதில் ஒரு வினோதம் என்னவென்றால். விஞ்ஞானியாக வேண்டும் என்ற எண்ணம் நம்மிடம் உள்ளது. ஆனால் அது பாட புத்தகத்தில் படிக்கும் விஞ்ஞானிகளைப் போல்.
ஐன்ஸ்டைன் பிறந்தார். சார்புநிலை கோட்பாட்டை நிறுவினார். ஈ=எம்.ஸி²  (E=MC² ) என்ற சூத்திரத்தை கண்டுபிடித்தார். அணு விஞ்ஞானியானார். பணமழையில் நனைந்தார். உலகம் போற்ற மரித்துப்போனார். இது தான் பாடப் புத்தகத்தில் உத்தரவாத மனப்போக்கில் கூறப்படும் ஐன்ஸ்டைன். உத்தரவாதமின்றி மனக்குழப்பத்தில் உழன்ற ஐஸ்டைனின் உண்மையான வாழ்க்கை மிக மிகச் சிலருக்கு மட்டுமே தெரியும். சரி என்ன செய்யலாம்?
விஞ்ஞானியாக முதலில் விஞ்ஞானத்தை மக்களுக்கு கற்கும் ஆர்வம் வரவேண்டும். விஞ்ஞானிகளும் நம்மைப்போன்ற மனிதர்களே என்று வாசிப்பின் மூலம் அறிந்து கொள்ளவேண்டும். உத்தரவாதமும், மந்தையோடு மந்தையாய் திரிவதும் நம்மை ஆராய்ச்சிக்கு தயார் படுத்தாது என்ற தெளிவும் பிறக்கவேண்டும். வாசிப்பும் ஆராய்ச்சி மனப்பான்மையும் நம் மனதை விசாலமாக்க வேண்டும்.
என்ன, அந்த வெளிநாட்டவர் கேட்ட கேள்வி சரிதானே.
எதற்காக இதையெல்லாம் நான் சொல்கிறேன்?
நான் விண்வெளியின் நிகழ்வுகளை பதிவு செய்யும் ஒரு வலைபூவை http://abcosmiccafe.blogspot.in/ துவக்கவுள்ளேன். ஏனென்றால், நாம் வாழ்வது நிலத்தில். பூமியின் மூன்றில் ஒரு பங்கு நிலம் என நாம் அறிவோம். அந்த நிலத்திலும் பாதி விண்வெளி. கீழே நிலம் என்றால், மேலே வானம். வானத்திற்கும் அப்பால் என்ன விண்வெளி. வானம் கண்ணாடி போல் விளங்கி நமக்கு விண்வெளியை காட்டுகிறது. விண்வெளியுடனான உறவு, நம் மூதாதயர் காலத்தில் இருந்து உள்ளது. விண்வெளியிலுள்ளவற்றை புரிந்து கொள்வது நம்மை புதியதொரு பரிமாணத்திற்கு இட்டுச்செல்லும். இதில் எந்த சந்தேகமும் வேண்டாம்.
அந்த வலைபூவில் என்னவெல்லாம் இருக்கும்?
அந்த வலைபூவின் மூல மொழி ஆங்கிலம். அதன் ஆங்கிலப் பதிவுகள் உலகின் பல்வேறு பகுதிகளில் விண்வெளி ஆராய்ச்சியில் ஈடுபாடு மிக்கவர்களுக்கு என் பகுதியின் விண்வெளிக் குறிப்புகளை வழங்கும். தமிழ்ப் பதிவுகள் தமிழில் விண்வெளி நோட்டத்திற்கு அவசியமானவற்றை விரிவாக விளக்கும். ஏன் இந்தப் பாகுபாடு என்றால் விண்வெளிநோட்டத்தில் வெளிநாட்டினருக்கு அடிப்படை அறிவு உள்ளது. ஆகையால் அவர்களுக்கு நம் பகுதி வானத்தின் செயல்பாடுமட்டும் போதுமானது. ஆனால் நமக்கு அவ்வளவு அடிப்படையெல்லாம் தெரியாது. ஆகையால் நம்மவர்களுக்கு அடிப்படையில் இருந்து ஆரம்பிப்பதே சிறந்தது.
நம் நாட்டில் சோற்றுக்கே வழியற்று பலர் இருக்கையில் விண்வெளி ஆராய்ச்சியெல்லாம் நமக்கு அவசியமா?
இது என்ன கேள்வி. நம் நாட்டில் பலர் சோற்றுக்கு வழியற்று இருப்பது நீங்கள் சினிமா பார்க்கையிலும் உணவுகளை விணாக்கும் பொழுதும் நினைவில் இல்லையா? மூன்று மனிநேரம் சினிமா பார்த்து நேரத்தை கொல்வதைக் காட்டிலும் விண்வெளி நோட்டம் எந்த வகையிலும் நம் நேரத்தை பாதிக்காது.
விண்வெளிநோட்டத்திற்கு எவ்வளவு பணம் செலவாகும்?
ஒரு நயா பைசா கூட இல்லை. உங்களிடம் இரு கண்கள் உள்ளதே அது போதும். முதலில் நாம் விண்வெளியை நோட்டமிட்டு நட்சத்திரங்களின் இருப்பை வரையருப்பதற்கு எந்த உபகரணமும் தேவையில்லை. நம் கண்களும் மூளையும் மட்டும் போதும். விண்வெளிநோட்டத்தில் நாம் உயர உயர சில உபகரணங்கள் தேவைப்படும். அவை என்னவென்று பிறகு பார்ப்போம்.
இப்போதைக்கு இது போதும் மற்றவற்றை அடுத்தடுத்த பதிவுகளில் பார்ப்போம். 

புதிய ப்ளாக்கின் முகவரி: 
           
       – ஏ.பி.தீன்